14 Gorffennaf 2023

Confensiwn Cyngor Ewrop ar Ddull Integredig o ran Diogeledd, Diogelwch a Gwasanaethau mewn Gemau Pêl-droed a Digwyddiadau Chwaraeon Eraill

Annwyl Mark,

Yn ein cyfarfod ar 29 Mehefin 2023, trafododd y Pwyllgor Gonfensiwn Cyngor Ewrop ar Ddull Integredig o ran Diogelwch, Diogeledd a Gwasanaethau mewn Gemau Pêl-droed a Digwyddiadau Chwaraeon Eraill.

Mae Memorandwm Esboniadol Llywodraeth y DU yn cadarnhau bod y Confensiwn yn ymwneud â materion a gadwyd yn ôl a materion datganoledig fel ei gilydd, ac yr ymgynghorwyd â’r llywodraethau datganoledig ar ddrafftio’r Confensiwn a pharatoi’r Memorandwm Esboniadol.

Mae Strategaeth Digwyddiadau Cenedlaethol Llywodraeth Cymru ar gyfer Cymru 2022 i 2030 yn nodi ei phrif amcanion ar gyfer denu a chefnogi digwyddiadau mawr, gan gynnwys digwyddiadau chwaraeon, a sut mae’r Llywodraeth yn bwriadu cyflawni’r rhain. Mae’r strategaeth yn rhestru nifer o ddigwyddiadau mawr a gynhelir yng Nghymru sy’n helpu i gyflawni ei huchelgais i “serennu ar lwyfan y byd”.

O ganlyniad i hyn, hoffai’r Pwyllgor ofyn i Lywodraeth Cymru am ragor o wybodaeth am y canlynol:

§    Ei barn am y Confensiwn, gan gynnwys ei effaith yng Nghymru a’r modd y mae’n ymwneud â strategaethau perthnasol Llywodraeth Cymru, gan gynnwys Strategaeth Digwyddiadau Cenedlaethol Cymru 2022 i 2030;

§    Ei rhan yn natblygiad y Confensiwn, gan gynnwys a yw hyn yn cael ei adlewyrchu yn nogfennau'r Confensiwn;

§    Natur trafodaethau rhynglywodraethol yn ymwneud â'r Confensiwn;

§    I ba raddau y mae gofynion y Confensiwn eisoes ar waith ar gyfer gemau pêl-droed a digwyddiadau chwaraeon eraill yng Nghymru;

§    A oes angen camau pellach i weithredu gofynion y Confensiwn yn llawn; a

§    Rôl a chyfrifoldebau Llywodraeth Cymru ac eraill wrth roi’r Confensiwn ar waith mewn meysydd datganoledig.

Byddwn yn ddiolchgar pe gallech ymateb erbyn 14 Awst 2023.

Yn gywir,

Delyth Jewell AS
Cadeirydd y Pwyllgor

 

Croesewir gohebiaeth yn Gymraeg neu Saesneg.

We welcome correspondence in Welsh or English.